Þrír styrkir til nýsköpunar og fagþróunar í BES
Á vormánuðum fékk Barnaskólinn á Eyrarbakka og Stokkseyri (BES) úthlutað þremur styrkjum til að efla og þróa skólastarf. Tveir þeirra eru frá Sprotasjóði og einn úr Endurmenntunarsjóði grunnskóla.
Sprotasjóður „Ljóðlína til lífs“
BES hlaut 710.000 kr. til verkefnisins Ljóðlína til lífs, sem miðar að því að efla ljóðræna tjáningu og notkun ljóða í námi með áherslu á miðstig. Verkefnið sameinar sköpun, lestur og túlkun. Verkefnastjórar eru Charlotte Sigrid á Kósini og Heiðrún Helga Ólafsdóttir.
Sprotasjóður „Í leiknum búa töfrarnir“
Verkefni sem hefur það markmið að kanna hvernig nýta má leik sem námstæki á yngsta stigi hlaut 1.000.000 kr. styrk. Verkefnastjóri er Sigríður Pálsdóttir.
Styrkirnir voru afhentir við hátíðlega athöfn í Mennta- og barnamálaráðuneytinu í gær, þar sem Guðmundur Ingi Kristinsson, mennta- og barnamálaráðherra, og Bragi Þór Svavarsson, formaður stjórnar Sprotasjóðs, stóðu fyrir formlegri afhendingu.
Endurmenntunarsjóður grunnskóla
Að auki hlaut BES 336.000 kr. úr Endurmenntunarsjóði grunnskóla til að styðja við innleiðingu nýrrar uppeldisstefnu í skólastarfinu. Styrkurinn verður nýttur í fræðslu og stuðning fyrir starfsfólkið í innleiðingarferlinu. Verkefnið hefur verið kynnt í skólaráði og verður kynnt foreldrum í upphafi næsta skólaárs.
Við í BES fögnum þessum styrkjum og tækifærunum sem þeir skapa til að efla faglegt starf, nýsköpun og skapandi nálgun í námi og kennslu.